Prentað miðvikudaginn 22. maí kl. 01:44 af www.kistan.is
1. apríl 2008 11:51

Hannes og Háskólinn III

Háskólafólk hefur tekið vel í að svara spurningum Kistunnar um mál Hannesar Hólmsteins. Hér að neðan eru svör næstu fjögurra einstaklinga, þeirra Eggerts Briem prófessors í stærðfræði, Hallfríðar Þórarinsdóttur, Hallfríðar Þórarinsdóttur doktors í mannfræði og forstöðumanns MIRRU, Ingunnar Ásdísardóttur þjóðfræðings og þýðanda, Ólínu Þorvarðardóttur doktors í þjóðfræði og Soffíu Auðar Birgisdóttur bókmenntafræðings og aðjúnkts við HÍ.

 

 

Eggert Briem, prófessor í stærðfræði við HÍ

 

1. Hvað finnst þér um nýfallinn dóm yfir Hannesi Hólmsteini Gissurarsyni prófessor í stjórnmálafræði við HÍ?

 

Eðlilegur.

2. Á rektor að aðhafast í málinu?

 

Já.

 

3. Ef svo, með hvaða hætti?

 

Kalla Hannes til sín, veifa framan í hann vísifingri og segja að
svona nokkuð geri maður hvorki í HÍ né hinum 99 skólunum. Fá honum síðan það verkefni að gefa út óbreyttar allar ræður forseta Íslands, Ólafs Ragnars Grímssonar, frá upphafi.

4. Hvað finnst þér um auglýsingu stuðningsmanna Hannesar sem birtist í blöðunum um helgina?

 

Fyrirsjáanleg.

 

5. Hefur þú hugsað þér að veita söfnuninni stuðning?

 

Nei.

 

Hallfríður Þórarinsdóttir, doktor í mannfræði og forstöðumaður MIRRU

 

1. Hvað finnst þér um nýfallinn dóm yfir Hannesi Hólmsteini Gissurarsyni prófessor í stjórnmálafræði við HÍ?


Mér þykir þessi dómur sannarlega réttmætur. Vinnubrögð Hannesar Hólmsteins eru ekki einasta siðlaus heldur og lögbrot eins og Hæstiréttur hefur komist að.

2. Á rektor að aðhafast í málinu?

 

Að sjálfsögðu. Háskóli Íslands missir allan trúverðugleik ef HHG fær að sitja áfram óáreittur í stöðu sinni. Það er ósanngjarnt gagnvart öllum heiðarlegum fræðimönnum stofnunarinnar.
Markmið HÍ að verða einn af hundrað bestu háskólum í heimi getur tæpast átt að innihalda slíkt siðleysi og lögbrot.

3. Ef svo, með hvaða hætti?

 

Segja honum upp. Hvernig eiga aðrir kennarar við
stofnunina að geta krafist þess af  nemendum sínum að þeir virði grunnreglur í akademískum vinnubrögðum ef prófessor við eina stærstu deild skólans gerir það ekki? Ef rektor segir ekki Hannesi upp er HÍ orðinn að einhverskonar leikhúsi fáránleikans.

4. Hvað finnst þér um auglýsingu stuðningsmanna Hannesar sem birtist í blöðunum um helgina?

 

Hún er náttúrulega bara grátbrosleg.

5. Hefur þú hugsað þér að veita söfnuninni stuðning?

 

Ég kýs fremur að fjárfesta í annars konar mannauði.

 

Ingunn Ásdísardóttir, þjóðfræðingur og þýðandi

 

1. Hvað finnst þér um nýfallinn dóm yfir Hannesi Hólmsteini Gissurarsyni prófessor í stjórnmálafræði við HÍ?

Það er einsýnt að þarna er um ritstuld að ræða; ritstuldur er lögbrot og rétt og sjálfsagt að dæma menn sem gera sig seka um slíkt. Séu svona vinnubrögð látin óátalin, eru þau lög sem kveða á um höfundarrétt ómarktæk og einskis verð.

2. Á rektor að aðhafast í málinu?


Rektor getur ekki annað en aðhafst eitthvað í málinu, annað væri óeðlilegt.

3. Ef svo, með hvaða hætti?


Ég sé ekki hvernig rektor getur forsvarað það að hafa kennara starfandi sem hefur gert sig sekan um vinnubrögð af þessu tagi; einkum og sér í lagi þar sem viðhorf viðkomandi kennara eru þau að þess konar aðferðafræði sé í lagi. Hann leyfir þá væntanlega nemendum sínum að gera slíkt hið sama en það brýtur í bága við þær aðferðir sem teljast viðurkennd vinnubrögð innan Háskóla Íslands. 

4. Hvað finnst þér um auglýsingu stuðningsmanna Hannesar sem birtist í blöðunum um helgina?


Mér finnst hún hlægileg en líka heldur dapurleg þar sem að henni stendur greinilega fólk sem sér ekkert athugavert við vinnubrögð viðkomandi og ætlar að koma honum hjá því að þurfa að standa reikningsskil gerða sinna. Þar að auki er þar blandað saman tveimur óskyldum málum með óljósu orðalagi til að rugla fólk í ríminu og vekja samúð þess. 


5. Hefur þú hugsað þér að veita söfnuninni stuðning?


Nei.

 

Ólína Þorvarðardóttir, doktor í þjóðfræði

 

1. Hvað finnst þér um nýfallinn dóm yfir Hannesi Hólmsteini Gissurarsyni prófessor í stjórnmálafræði við HÍ?

Ég tel að þetta sé eðlilegur dómur.

2. Á rektor að aðhafast í málinu?

Já, það er óhjákvæmilegt.

3. Ef svo, með hvaða hætti?

Í samræmi við ákvæði og heimildir stjórnsýslulaga um viðbrögð við brot í starfi.

4. Hvað finnst þér um auglýsingu stuðningsmanna Hannesar sem birtist í blöðunum um helgina?

Hún er háðung.

5. Hefur þú hugsað þér að veita söfnuninni stuðning?

Nei.

 

Soffía Auður Birgisdóttir, bókmenntafræðingur og aðjúknt við HÍ

 

 1. Hvað finnst þér um nýfallinn dóm yfir Hannesi Hólmsteini Gissurarsyni prófessor í stjórnmálafræði við HÍ?

 

Dómurinn er í takt við afbrotið.


2. Á rektor að aðhafast í málinu?

 

Já, annað er ófært og væri skólanum til háðungar.

 

3. Ef svo, með hvaða hætti?

 

Verði nemandi við H.Í. uppvís að ritstuldi er hann fallinn í viðkomandi námskeiði og á á hættu að vera vikið úr skóla. Stundum er tekið mildilega á slíkum afbrotum og fallið látið nægja ásamt áminningu. Málið hlýtur að vera enn alvarlegra þegar um prófessor við skólann er að ræða. Ef rektor metur málið þannig að brotið varði ekki fullnaðarbrottvikningu úr starfi
væri kannski ráð að víkja prófessornum tímabundið úr starfi og skylda hann til að taka námskeið í akademískum vinnubrögðum sem ReykjavíkurAkademían hefur staðið fyrir í Endurmenntun Háskóla Íslands.

 4. Hvað finnst þér um auglýsingu stuðningsmanna Hannesar sem birtist í blöðunum um helgina?

Hjákátleg.


5. Hefur þú hugsað þér að veita söfnuninni stuðning?

 

Nei.





 


 

Ritstjórn


Til baka


yfirlit frétta