30. júlí 2010 09:11
Þórunn Hrefna Sigurjónsdóttir
Þórunn Hrefna Sigurjónsdóttir var mikill dugnaðarforkur og bónusvíkingur á sínum yngri árum og vann þá ýmis störf til sjávar og sveita, en snemma fór þó að síga á ógæfuhliðina. Hún tók B.A. próf í bókmenntafræði og hefur síðan starfað á dagblaði, femínistatímariti, bókasafni og bókaforlagi, þýtt nokkrar bækur almenns efnis og skrifað fjórar ævisögur, m.a. um nöfnurnar Margréti Frímannsdóttur og Margréti Pálu Ólafsdóttur.
9. júlí 2010 11:01
Hjálmar Einarsson
Hjálmar Einarsson er leikstjóri bíómyndarinnar Boðbera, sem frumsýnd var í vikunni. Hann lærði kvikmyndagerð í kvikmyndaskólanum FAMU í Tékklandi, þar sem hann lærði meðal annars hjá kviðmági Joseph Göbbels.
21. maí 2010 18:07
Kári Tulinius
Kári Tulinius sendi í vikunni frá sér sína fyrstu skáldsögu, Píslarvottar án hæfileika, sem kom út hjá Forlaginu. Hann hefur stundað nám í bókmenntafræði í HÍ og í Bandaríkjunum en tók sér frí til þess að skrifa bókina, en hefur nú tekið upp þráðinn aftur og vinnur að BA-ritgerð.
1. apríl 2010 16:41
Angela Rawlings
Angela Rawlings (eða a.rawlings) er kanadískt skáld og þverfaglegur listamaður. Hennar fyrsta bók var Wide slumber for lepidopterists og hún hefur eytt þessu ári og því síðasta í Belgíu, Kanada og á Íslandi við að vinna að handritum næstu bóka, rannsaka samband hljóðs, texta og hreyfingar og finna samstarfsfleti með listamönnum á staðnum. Í Reykjavík hefur hún einnig haldið ritsmiðjur með skáldum sem og áhugamönnum í samstarfi við Nýhil.
19. mars 2010 10:10
Þórdís Nadia Semichat
Þórdís Nadia Semichat er Íslandsmeistari í magadansi, uppistandari, barþjónn, framkvæmdastjóri, kvikmyndafræðinemi og verðandi leikkona. Sem sagt dæmigerður alltof-bissí Íslendingur. Hún stofnaði uppistandsfélagið Uppistöðufélagið, hóp kvenna sem hafa stundað uppistand á Næsta bar undanfarna mánuði við góðar undirtektir. Þar vinnur hún raunar einnig sem barþjónn og framkvæmdastjóri, þegar hún er ekki að kenna magadans í Kramhúsinu. Þá mun hún leika í Borgríki Ólafs de Fleur, sem nú lítur út fyrir að verði að veruleika eftir allt saman.
26. febrúar 2010 14:06
Ingi Björn Guðnason
Ingi Björn Guðnason er bókmenntafræðingur og starfar sem verkefnastjóri hjá Háskólasetri Vestfjarða en hans verður þó væntanlega helst minnst sem mannsins sem afhjúpaði frúna í Hamborg.
19. febrúar 2010 10:00
Halla Gunnarsdóttir
Halla Gunnarsdóttir er kona marghöm. Hún er kennari og alþjóðastjórnmálafræðingur, titlar sig sem blaðamann, vann lengi á Mogganum, var aðstoðarkona Ögmundar Jónassonar í heilbrigðisráðuneytinu, er nýgengin í Rithöfundasambandið og með eina viðtalsbók í vinnslu, en áður hefur hún sent frá sér ljóðabókina Leitin að Fjalla-Eyvindi og viðtalsbókina Slæðusviptingar: raddir íranskra kvenna. Þessa dagana situr hún að mestu í Háskóla Íslands og skrifar um öryggis- og varnarmál.
12. febrúar 2010 12:18
Hannes Óli Ágústsson
Hannes Óli Ágústsson er leikari og bókmenntafræðingur sem undanfarið hefur farið með leikritið Munaðarlaus landshorna á milli og var nýbúinn að sýna á Akureyri þegar hann svaraði Kistunni. Einhverjir gætu líka kannast við hann úr hlutverki gluggagægisins Sigmundar Davíðs í síðasta áramótaskaupi.