23. desember 2009 11:13

Wali Safi

Wali Safi hefur verið heilmikið í fréttum undanfarna mánuði þótt sjaldnast hafi nafn eða mynd fylgt þeim fréttum. Hann er hælisleitandi og hefur þetta að segja um uppruna sinn: „Ég er fæddur árið 1977 í austurhluta Afganistan. Ég hef lokið menntaskóla (High School) og var á öðru ári í viðskiptaháskóla þegar ég neyddist til þess að yfirgefa land mitt vegna hatramms stríðs, óöryggis og óréttlætis. Það hafa liðið nærri tólf ár síðan ég var þar síðast,“ segir Safi sem tekur fram að hann reyni að hugsa sem minnst um þá slæmu reynslu sem hann hefur stundum mátt þola bæði í eigin landi sem og sem hælisleytandi í Evrópu, oftast að hálfu yfirvalda.

Wali er mikill tungumálamaður, talar ensku, grísku, persnesku, hindí og pashto. Og hann er sannarlega sigldur, þótt ferðalögin hafi sjaldnast verið á fyrsta farrými. „Ég hef komið til landa á borð við Íran, Tyrkland og Grikkland, og á leið minni til Íslands heimsótti ég í styttri tíma lönd á borð við Frakkland, Svíþjóð og Noreg,“ segir Wali sem hefur búið á Íslandi síðan í júní árið 2008.

„Ég hef unnið í lyfjaverslun og stórmörkuðum, ég var sjálfboðaliði Rauða hálfmánans í Afganistan. Þegar ég bjó í Afganistan stundaði ég ýmsar íþróttir sem eru ekki vinsælar í öðrum löndum. En ég hef gaman af því að hlaupa, synda og hjóla, og ég hef gaman af bíómyndum og tónlist.“ En hvert stefnir hann? „Draumurinn er að ljúka mínu ólokna námi og geta lifað eðlilegu lífi í öryggi, ég held að sérhver manneskja verðskuldi það.“

En nóg af almennum spurningum, nú er komið að lúðaspurningunum.

Síðasta bók sem hafði áhrif:

Núna er ég að lesa bók um ævi Fidel Castro eftir hann sjálfan og Ignacio Ramonet, en ef ég á að nefna einhverja fullkomna bók myndi ég nefna The Gadfly eftir Ethel Lilian Voynich. Hún fjallar um baráttu alþjóðlegs byltingamanns á Ítalíu.

Kvikmynd sem snerti taug:

Píanistinn, (The Pianist) ... ég held að orð séu lítt til þess fallinn að greina frá þessari mynd Roman Polanski. En ég fíla hins vegar einfaldlega ekki óraunverumyndir á borð við Avatar.

Hver leikur aðalhlutverkið í ævisögunni?

Hver mun leika það betur en ég sjálfur? Bíómynd lífs míns er enn í sýningu og ég er að leika sjálfan mig. Lífið er eins konar leikrit sem endar þig við endum. En ef ég þyrfti samt að velja einhvern annan myndi ég velja Wentworth Miller (einn aðalleikara Prison Break).

Hvaða plötu á lesandi að setja á fóninn á meðan hann les þetta?

Ég sting upp á safni panflaututóna eftir Gheorghe Zamfir, sérstaklega Einsamer Hirte, sem er einmitt jafngamalt mér og ég hef hlustað á svo lengi sem ég man.

Uppáhaldsljóðskáld:

Ég hef verið aðdáandi ljóðskálda frá miðausturlöndum eins og Saadi (innsk. ritstjóra: og hér bregst ritstjóra þýðingarnefið);

        of one essence  is the human race,

        thusly has creation put the base.

        one limb impacted in sufficient,

        For all others to feel the Mace.

        The Unconcern'd the Other´Pilght,

        Are but Brutes with Human Face

Minnistæður kennari:

Eftirminnilegasti kennari lífs míns var faðir minn heitinn, hann var prófessor við læknadeild.

Hvaða lexíu lærðirðu síðast?

Lífið er fullt af óvæntum uppákomum, góðum og slæmum, en það eru alltaf einhverjar leiðir til þess að lifa af.

Merkilegasti óuppgötvaði listamaðurinn?

Allir geta hugsanlega verið merkilegasti óuppgötvaði listamaðurinn.

Hvar er draumurinn?

Draumurinn er í frelsinu.

Gott sparnaðarráð í kreppunni:

Hætta að horfa á auglýsingar í sjónvarpinu.

Hver er eftirminnilegasta matarminningin?

Þegar mér var boðið á veitingastað til þess að borða humar í fyrsta skipti, það var sannkallaður gamanleikur.

Hver er merkilegasti maður sem þú hefur dottið í það með?

Ég er ekki mikilvægur einstaklingur, en eitt sinn var ég drukkinn og leit í spegil og sagði við sjálfan mig: „Þú ert fjandi drukkinn.“

Hvaða tónlist hæfir tímunum?

Venjulega hlusta ég á alls kyns tónlist, nema þungarokk. En sú tónlist sem hæfir tímunum er að mínu mati róleg tónlist eins og tónlist Enyu.

Hvar sérðu sjálfan þig eftir fáeina mánuði?

Líf mitt er óútreiknanleg, ekkert er öruggt, alls staðar eða kannski hvergi!

----------------------------------------------------------------

Rétt er að benda einnig á enska útgáfu viðtalsins sem finna má á enskumælandi systursíðu Kistunnar, Culture Smuggling.

Til baka

yfirlit frétta